د کب ۲۰مه، د نيالګيو ايښودلو ملي ورځ ولمانځل شوه
په دې غونډه کې، چې د رحمان بابا لېسه کې جوړه شوه، سرحدونو او قبایلو چارو وزیر ښاغلي محب الله صمیم، د چاپېریال ساتنې ملي ادارې لوې رييس شاه زمان ميوندي، د وزارت مشرتابه او د یادې لېسې چارواکو ګډون کړی و.
د غونډې په پيل کې د وزارت د ښوونې او روزنې رييس ښاغلي محمد نبي شهاب د غونډې ګډونوالو او مېلمنو ته ښه راغلاست ووايه او د پروګرام د موخو او د لېسو او انستیتوت د چارو په اړه يې لنډ معلومات وړاندې کړل.
ورپسې د سرحدونو او قبایلو چارو وزیر ښاغلي محب الله صمیم وينا وکړه او د چاپېریال ساتنې ارزښت ته يې په اشارې سره وويل: تېره اوونۍ مو د وزارت په انګړ کې نیالګي کېښودل دادی نن موږ د رحمان بابا په عالي لېسه کې د نیالګیو په اېښودلو سره هڅه کوو خپل اکاډمیک چاپیریال ښکلی کړو، ترڅو زده کوونکي وکړاې شي په سمسوره فضا کې خپلې زده کړې پرمخ بوځي.
ښاغلي صمیم د لېسو زده کوونکو او اداري کارکوونکو ته لارښوونه وکړه، چې د نیالګیو روزلو ته پاملرنه وکړي او ښه یې وروزي، ځکه سمسور چاپیریال ساتل زموږ د ټولو دنده ده او موږ باید په دې برخه کې خپل مسوولیت په ښه توګه ادا کړو.
وروسته د چاپېریال ساتنې ملي ادارې لوی ريس ښاغلي شاه زمان ميوندي د چاپېریال ساتنې د ګټو او مثبتو اغېزو په اړه خبرې وکړې وویل: افغانان بايد زرغون انقلاب رامنځته کړي.
نوموړي دغه راز په ټولو هېوادوالو غږ وکړ، چې د نیالګیو په اېښودلو سره خپل چاپېریال سمسور او له ککړتیا وژغوري د دې سره به هم د ناروغیو مخه ونیول شي او هم به د هېواد د آبادۍ سبب شي.
د پروګرام په وروستيو شيبو کې د موضوع په اړه د يادې لېسې امر ښاغلی محمد عمر معصومی او يو تن زده کوونکي تر خبرو ورسته ښاغلي صميم، ښاغلي ميوندي او اړوندو چارواکو نيالګې کېښودل.
