د پکتیکا او لوګر ولایتونو له یو شمېر قومي مشرانو او ځوانانو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې مخکې د پکتیکا او لوګر ولایتونو له یو شمېر قومي مشرانو او ځوانانو سره وکتل.
په دې کتنه کې راغلو قومي مشرانو او ځوانانو لومړی د خپلو ولایتونو سیمه ییزې ستوتزې او یو لړ غوښتنې له ښاغلي محب الله صمیم سره شریکې کړې، وې ویل: هیله مو دا ده، چې وزارت د خپلو امکاناتو سره سم زموږ ستونزو ته د حل لارې چارې پیدا کړي او همکاري راسره وکړي همدار راز یې د سرحدونو او قبایلو چارو وزارت د قومونو د ستونزو د هوارولو په برخه کې یو ډاډمن ځای وباله او د خپلو همکاریو ډاډ یې ورکړ.
ورپسې ښاغلي محب الله صمیم د راغلو مشرانو او ځوانانو خبرې واورېدې او د نظام څخه د ملاتړ په برخه کې یې د نوموړو هڅې وستایلې وې ویل: د لویې پکتیکا ولسونو تل د نظام د پایښت په لار کې قرباني ورکړې او د جمهوریت ملاتړ یې کړی، چې ستاسو سرښندنې ولسونو ته روښانه دي انشاالله ستونزو اوغوښتنو ته به مو د وزارت د امکاناتو په چوکاټ کې حل لارې وګورو.
