د پکتیا ولسونو په یوې ولسي جرګه کې د سولې په اړه د بین الافغاني خبرو، جمهوري نظام، امنيتي ـ دفاعي ځواکونو څخه ملاتړ او د دایمي اوربند غوښتنه وکړه.
دغه ولسي جرګه چې د پکتیا د سرحدونو او قبایلو چارو ریاست له لوري په شاهي رستوانټ کې جوړه شوې وه، د فیض الرحمن مسلم په مشرۍ د وزارت په پلاوي سربېره، د پکیتا والي محمد حلیم فدايي او ګڼ شمېر قومي مشرانو، ځوانانو، ټولنیزو فعالانو او ښځو برخه اخیستې وه.
په پیل کې یې د پکتیا د سرحدونو او قبایلو چارو سرپرست رئیس دولت خان دولت زي د ښه راغلاست وینا وکړه او د یادې غونډې جوړېدو موخه یې بیان کړه.
ورپسې د سرحدونو او قبایلو چارو وزارت د جرګو د تنظیم لوی مدیر محمد ظاهر حلیمي خبرې وکړې، نوموړي وویل د لویې پکتیا ولسونو د تاریخ په اودو کې د هېواد اونظام د ستاتنې په لار کې کې قرباني ورکړې او مهم رول یې لوبولی اوس د دې وخت راغلی، چې تر تولو مهمه پروسه سوله کې هم خپل رول د تل په شان څرګند کړي، چې پر وینا ننۍ غونډه یې یو ښه مثال دی چې د سولې او اوربند غوښتلو په خاطر راټول شوي دي.
د پکتیا والي محمد حلیم فدایي د سولې او اوربند په تړاو جوړې شوې غونډې ته په خپله وینا کې وویل مونږ سوله غواړو نه، بلکې سوله کوو ځکه سوله د الله امر دی او دا باید ونه غوښتل شي بلکې په عملي ډول ترسره شي، هغه وویل د افغانستان اوسنی نظام په بشپړه توګه شرعي او اسلامي دی او هیڅ دلیل دې ته نه پیداکېږي چې په وړاندې یې څوک د جګړې فتوا ورکړي، ولس ته په کار دی چې د دولت تر څنګ ودرېږي.
نوموړي زیاته کړه ټول قومونه دې د سولې تړونونه وکړي که طالبان د شریعت، قومي تړون او هرې لارې سولې ته غاړه ږدي مونږ ورته تیار یو. دغه راز هغه د ښځو نقش په سوله کې خورا مهم او ضروري وباله ځکه د جګړې تر ټولو ډېره قرباني خوېندې ورکوي نو په دې خاطر باید ورته د سولې پروسه کې زیاته ونډه ورکړل شي.
دغه راز د غونډې نورو ویناوالو هریوه د پکتیا د علماوو شورا رئیس قاري خواجه الدین حقبیان، د ولایتي شورا رئیس عبدالمالک مجاهد ځاځۍ، د پکتیا د ځوانانو رئیس جمعه ګل افغان، علي جان محمدي، حاجي عطامحمد فیروز، حاجي خان منګل، ناظم ځدراڼ، رسول خان احمدخېل او د خوېندو په استازیتوب ډاکترې نازدانې پکتیاوال خبرې وکړې، ټولو ویناوالو په خپلو خبرو کې ټینګار وکړ چې مونږ د پکتیا ټول ولسونه یوه اسلامي او دایمي سوله غواړو او په قطر کې د سولې روانو خبرو، نظام، امنيتي او دفاعي ځواکونو څخه ملاتړ اعلان او د دایمي اوربند غوښتنه یې وکړه څخه په کلکه ملاتړ کوو، دوی ټولو په هېواد کې اوسنۍ جګړه د افغانستان د ولسونو او اسلام مقدس دین پر ضد یاده کړه او غوښتنه یې وکړه چې نور دې دغه جګړه پای ته ورسوي او سوله دې وکړي.
غونډه په هېواد کې د تلپاتې سولې او ټینګښت په دعا سره پای ته ورسېده.
