د پکتیا ولایت د مرکز او بېلابېلو ولسواليو د یو شمېر قومي مشرانو، دیني عالمانو او مخورو ستونزې او غوښتنې واورېدل شوې!
۱۴۰۰/۷/۱۴، ۱۴۴۳/۲/۲۹ د سرحدونو او قبایلو چارو وزارت سرپرست محترم ملا نورالله نوري نن له غرمې مخکې په داسې حال کې چې د وزارت د عامه اړيکو او ښوونې او روزنې مسؤل محترم شیخ حضرت ولي حقاني هم حاضر و، په ګرديز کې د پکتيا ولايت د مرکز او مختلفو ولسواليو له یو شمېر قومي مشرانو، دیني عالمانو او مخورو سره وکتل او د هغوې ستونزې او غوښتنې يې واورېدې.
غونډه دعظیم الشان قرآن د څومبارکو آیتونو په تلاوت پیل شوه. ورپسې يو شمېر قومي مشرانو د نورو په استازیتوب ښاغلي نوري او ورسره مل پلاوي ته ښه راغلاست ووايه. نوموړو په هېواد کې د اسلامي امارت د ټینګښت او فتوحاتو له امله خوښي څرګنده کړه وی ویل: د پکتیا ولایت ولسونو د تاريخ په اوږدو کې د اسلام د مقدس دين په لار کې بې شمېره قربانۍ ورکړي او اوسمهال هم د اسلامي امارت د مجاهدینو تر څنګ ولاړ دي. نوموړو دغه راز خپلې يو لړ سيمه ييزې ستونزې او غوښتنې شريکې کړې، چې پکې د سرحدي ولسواليو د خلکو ستونزې، د دواړو غاړو د قومونو او قبايلو تر منځ د اړيکو پراختيا او انسجام، په کرښه د خلکو د تګ راتګ او په سوداګری اسانتيا شامل دي او همدارنګه يې د هېواد د ټولو ولسونو ترمنځ په اتحاد او اتفاق ټینګار وکړ او له اسلامي امارت څخه يې خپل بشپړ ملاتړ څرګند کړ.
ورپسې د وزارت د عامه اړيکو او ښوونې او روزنې مسؤل محترم شيخ حضرت ولي حقاني د اسلام د مقدس دين په رڼا کې د انسانانو حقوق او وجايب بيان کړل، زياته تکړه يوازې با تقوا کسان کولای شي ، چې ټولنه د پرمختګ پر لور سوق کړي . نوموړي د مجاهدینو مجاهدت او په دې لار کې د دوې سرښندنو باندې هم رڼا واچوله وویل: اوس، چې د اسلامي امارت مجاهدینو د زرګونو شهیدانو په سرښندنې او الهي نصرت سره د اسلام او خلکو دښمنانو ته ماتې ورکړه نو په کار ده، چې د افغانستان ټول ولسونه سره لاسونو ورکړو او د اسلامي شریعت په رڼا کې د خپل هېواد د آبادۍ او سرلوړي لپاره نه ستړي کېدونکې هلې ځلې وکړو. ورپسې د سرحدونو او قبایلو چارو وزارت سرپرست محترم ملا نورالله نوري خبرې وکړې زياته يې کړه: خوشاله يم چې نن په ګرديز کې د پکتيا له شمله ورو ولسونو سره له نږدې ګورم او ستونزې يې اورم. نوموړي زياته کړه: د پکتيا ولسونو د شل کلن اشغال او جهاد په دوره کې زیاته ونډه اخیستې، چې دا کار له وطن سره د دوې د مينې ښکارندويي کوي. ښاغلی نوري دغه راز د اشغال دوران او له امله یې په ټولنه کې راز راز ستونزو ته هم اشاره وکړه، وې ویل: جهاد یوازې جګړه نه ده، جهاد د دوو اساسي موخو لپاره ترسره شوی، چې یوه یې د پردو له سلطې او اشغال څخه د هېواد د خپلواکۍ ترلاسه کول او بله یې د اسلامي نظام ټینګښت دی، چې د پاک الله ج په نصرت او د افغان مجاهدينو په سرښندنو سره موږ دغو دواړو موخو ته رسېدلې یو اوس به هڅه وکړو چې افغانستان د اقتصادي پلوه هم په پښو ودريږي او نور افغان ولس ونه ځوريږي. ښاغلي نوري ډ خپلو خبرو په دوام وويل: هر افغان که هغه د نظام په دننه کې وي او يا له نظام څخه به بايد د اسلامي نظام ترسيورې لاندي د کورنيو او بهرنيو د سيسو او فتنو مخه ونيسي او د هېواد د دښمنانو منفي تبليغات او توطيې شنډې کړي همدارنګه ښاغلي نوري دوې ته ډاډ ورکړ، چې ستونزې به يې د حل په موخه له اړوندو ادارو سره شريکې کړي دغه راز ښاغلي نوري د خپلو خبرو په دوام وویل: افغانستان د ټولو افغانانو ګډ کور دی او افغانان به خپل هېواد په ګډه جوړوي . دا زموږ د ټولو هېواد والو اسلامي او هېوادني مسوولیت دی، چې ستونزو ته په ګډه حل لارې پیدا کړو او د هېواد د آبادولو او پرمختګ لپاره مټې راونغاړو. وروسته د پکتیا ولایت د سرحدونو او قبایلو چارو رييس محترم مولوي سردار محمد له راغلي پلاوي او د غونډې له ګډونوالو څخه مننه وکړه چې له زياتو مصروفیتونو سره سره يې په دې ولسي غونډه کې له يو بل سره خپل اندونه او وړانديزونه شريک کړل.
