د پکتیا او لوګر ولایتونو له یو شمېر قومي مشرانو او مخورو سره ناسته!
د سرحدونو او قبایلو چارو وزیر ښاغلی محب الله صمیم نن مازدیګر د پکتیا او لوګر ولایتونو له یو شمېر قومي مشرانو او مخورو سره وکتل.
په دې کتنه قومي مشرانو ښاغلي محب الله صمیم یو ولسي او مجرب کدر وباله هیله یې څرګنده کړه، چې وزارت به دده تر مشرۍ لاندې په بېلابېلو برخو کې اغېزمن ګامونه ترسره کړي.
نوموړو دغه راز د جمهوري نظام څخه د ملاتړ په ترڅ کې خپلې یو لړ سیمه یيزې ستونزې له ښاغلي صمیم سره د حل په موخه شریکې کړې.
ورپسې ښاغلي صمیم د دوې له راتګ څخه د مننې په ترڅ کې وویل: د پکتیا او لوګر ولایتونو باتورو ولسونو تل د نظام په ساتنه او دفاع کې هلې ځلې کړي دي، موږ به په ګډه هڅه وکړو، چې په هېواد کې د موجوده نظام د پایښت او تلپاتې اوربند د ټینګښت لپاره ولسونه سره منسجم کړو، ترڅو وکړای شو هېواد له روانو بدبختیو څخه وژغورو.
