د پاکستان څخه په جبري توګه د راستنېدونکو افغان کډوالو له کمپ څخه ليدنه
د پاکستان څخه په جبري توګه د راستنېدونکو افغان کډوالو له کمپ څخه ليدنه
دوشنبه ۲۳ شوال ۱۴۴۶
د سرحدونو، قومونو او قبايلو چارو وزارت د جرګو او قبایلي چارو د همغږۍ معین الحاج مولوي محمد علي جان احمد له مل پلاوي سره يوځای تېره ورځ د کندهار ولايت په سپين بولدک ولسوالۍ کې له پاکستان څخه په جبري توګه د راستنېدونکو افغان کډوالو له موقتي کمپ څخه ليدنه وکړه.
د دغه ليدنې پرمهال ښاغلي احمد د راستنو شويو کډوالو د بيلا بيلو کورنيو احوال واخيست، ستونزې يې واوريدلې او د ځايې مسؤلينو ترڅنګ يې د يادو کډوالو لپاره د جوړو شويو کمېټو استازي لا ښه خدمت ته وهڅول نوموړي وويل: د ديني او ملي مسئوليت له مخي اړ يو، چي د راستنېدونکو هيواد والو خدمت په ښه ډول وکړو او خپل ولس ته مورال ورکړو، تر څو راتلوونکی ژوند په امن، عزت او خوشالۍ سره وکړي.
د راغلو کډوالو د کورنيو مشرانو د سرحدونو، قومونو او قبايلو چارو وزارت د همغږۍ معين سره د ليدنې له امله مننه وکړه او د اسلامي امارت په ښو خدمتونو يې د خوښۍ څرګندولو ترڅنګ د اللّٰه ج شکر ادا کړ، چې د پردي وطن له احتياجه خلاص شوو او په خپل هيواد کې يې قدمونه کېښودل.
د يادولو وړده، چي د سپین بولدک او طورخم له لارې د پاکستان څخه هره ورځ سلګونه مهاجرې کورنۍ هيواد ته راستنېږي، چي د اسلامي امارت لخوا ورته بشپړ چمتوالی نیول شوی او د لومړنيو اړينو مرستو ترڅنګ هره کورنۍ په ډېر عزت تر خپل ټاکلي ځايه رسول کیږي.
