د هېواد له بېلابېلو قومي مشرانو، مخورو او ځوانانو سره لیدنه!
د سرحدونو او قبایلو چارو وزیر ښاغلي محب الله صمیم نن له غرمې مخکې د هېواد له بېلابېلو ولایتونو له یو شمېر قومي مشرانو، مخورو، ځوانانو او ښځینه فعالانوسره د خپل کار په دفتر کې وکتل.
د کتنې په پیل کې یادو قومي مشرانو، ځوانانو او ښځینه فعالانو په خپلو خبرو کې د سرحدونو او قبایلو چارو د وزیر په توګه د ښاغلي محب الله صمیم د ټاکل کېدو له امله، چې د ولس له کور څخه یې د باور لوړه رایه ترلاسه کړه مبارکي وویله او خپلې یو لړ ستونزې یې د سرحدونو او قبایلو چارو وزارت له مشرتابه سره شریکې کړې وې ویل: د سولې او بیارغونې لپاره به ټول قومي مشران سره لاس په کارشو او د خپل موجوده نظام او ولس څخه به ملاتړ وکړو.
ورپسې د سرحدونو او قبایلو چارو وزیر ښاغلي محب الله صمیم په خپلو خبرو کې د سولې په ټینګښت، د پولو په ساتلو او د ټولګټو ملي پروژو په تطبیق کې د قومي مشرانو ونډه او همکاري ارزښتناکه وبلله وې ویل: موږ به د تل په څېر د سولې او امنیت په برخه کې خپلو هلو ځلو ته دوام ورکړو او ستاسو ستونزې به له اړوندو ادارو سره شریکې کړو او هڅه به مو دا وي، چې په هېواد کې د مېشتو درنو قومونو ترمنځ د ورورولۍ فضا رامنځته کړو.
