د نيمروز ولايت له يو شمېر قومي مشرانو سره کتنه
د سر حدونو او قبایلو چارو وزیر ښاغلي محب الله صمیم نیمروز ولایت ته د خپل رسمي سفر په ترڅ کې د یاد ولایت له یو شمېر قومي مشرانو او مخورو سره وکتل!
په دې کتنه کې د نیمروز ولایت یو شمېر قومي مشرانو او مخورو د نظام، جمهوریت او د امنیتي ځواکونو د ملاتړ سربېره، ټینګار وکړ چې د نیمروز ولسونو تل د نظام، جمهوریت د بقا او پایښت لپاره هڅې کړي.
دوی دغه راز د سرحدونو او قبایلو چارو له وزیر ښاغلي محب الله صمیم سره د خپلو یو لړ سیمه ییزو ستونزو د شریکولو تر څنګ ژمنه وکړه، چې د ملي یووالي، د ولسونو په انسجام، د سولې ټینګښت په برخو کې به له وزارت سره خپلو همکاريو ته دوام ورکوي.
ورپسې ښاغلي محب الله صمیم د شته نظام د بقا او پایښت په برخو کې د نیمروز ولایت د ولسونو له قربانیو او سرښندنو څخه مننه وکړه او ډاډ یې ورکړ، چې د نیمروز ولایت د ولسونو شته ستونزې به د حل په موخه له اړوندو ادارو سره شریکې کړي.
