د ننګرهار په دره نور ولسوالۍ کې ۷ کلنه شخړه حل شوه
سشنبه ۱۴۴۶/۶/٨
د ياد ولايت د سرحدونو، قومونو او قبايلوچارو رياست په مشرۍ، د قومي سپين ږيرو او علماوو په دوامداره همکارۍ په دره نور ولسوالۍ کې د ځمکې پر ملکيت د دوو کلیو تر منځ هغه ۷ کلنه دښمني پای ته ورسېده، چې له دواړو خواوو پکې دوه تنه وژل شوي او دوه نور پکې ټپيان شوي هم وو.
د دغې روغې جوړې پر مهال علماوو اومسؤلينو ښکېلو خواوو ته لومړی د سولې او عفوې تړاو هر اړخيزې خبرې وکړې اوبيا يې له هغوی وغوښتل چې، د دښمنۍ او نفاق پر ځای ګډ او سولييز ژوند ته مخه کړي، چې په همدې موخه يې ترمنځ د خير فيصله وشوه، چې په همدې سره يې ياده ۷ کلنه دښمني هم پای ته ورسېده.
د يادونې وړ ده چې تر دې وړاندې هم د ننګرهار په سرخرود ولسوالۍ کې ۳۰ کلنه دښمني د سرحدونو، قومونو او قبايلو چارو رياست مسؤلينو لخوا هواره شوه، چې څلورو تنو ته په کې مرګ ژوبله اوښتې وه.
