د ننګرهار له بېلابېلو قومي مشرانو سره ليدنه!
د سرحدونو او قبایلو چارو سرپرست او نوماند وزير ښاغلي محب الله صميم نن ماښام د ننګرهار د شينوارو، مومندو او خوګياڼو له قومي مشرانو او مخورو سره وکتل.
په دې کتنه کې قومي مشرانو الحاج جهانزیب مومند، وکیل صاحب عصمت الله خان او حاجي مسلم خوګياني د سرحدونو او قبايلو چارو د سرپرست او نوماند وزير په توګه د ښاغلي محب الله صميم انتخاب غوره او پرځای اقدام وباله او د سولې او ملي يووالي په ټينګښت کې يې د وزارت هلې ځلې وستایلې او له وزارت سره يې د قومونو او قبایلو په انسجام او نورو برخو کې د هر ډول همکاريو ډاډ ورکړ.
ورپسې ښاغلي صميم د دوې له ملي احساس او همکاريو څخه د مننې په ترڅ کې وزارت د ټولو قومونو او قبایلو ګډ کور وباله زياته يې کړه قومي او قبايلي مشران د خپلو قومي ظرفيتونو او نفوذ څخه په استفادې سره کولای شي د سولې او ملي يووالي په ټينګښت، د قومونو د انسجام او د نظام د ساتنې په لار کې مهم رول ولوبوي.
