د منازعاتو د حل له کمیسیونونو سره ناسته
۳/۱۱/۱۴۴۵
د سرحدونو، قومونو او قبایلو چارو سرپرست وزیر الحاج ملا نورالله نوري په بامیان او میدان وردګو ولایتونو کې د سیمه ییزو قومونو تر منځ د شخړو د حل کمېسیونونو له استازو سره د وزارت د ناستو په تالار کې وکتل.
د دغې کتنې پر مهال د شخړو د حل کمېسیون څو استازو خبرې وکړې، د اسلامي امارت له مسؤلینو یې خوښي څرګنده کړه او د خپلو ترسره کړیو فعالیتونو په اړه یې معلومات وړاندې کړل. دوی وویل د تېر حکومت پر مهال په یوه کال کې یوازې په میدان وردګو ولایت کې د شخصي دښمنیو له کبله ۱۸۵ تنه مړه او په لکونو مالي زیانونه واوښتل خو اوس لله الحمد د ټول ولایت په سطحه موږ کومه ستونزه نه لرو او که چیرته په کوم ولایت کې پېښه هم شي موږ یې سمدستي د حل کوښښ کوو. د راغليو کمیسیونونو مشرانو له وزارت مقام څخه په مالي، لوژیستیکي او ترانسپورتي برخه کې یې د لا زیاتې پاملرنې غوښتنه وکړه.
ورپسې د سرحدونو، قومونو او قبایلو چارو سرپرست وزیر ښاغلي نوري دوی ته تر هرکلي کولو وروسته وویل: دا د الله تعالی(ج) یوه لویه لورینه ده چې سوله یې را په برخه کړې او د اسلامي نظام تر چتر لاندې یې د خدمت موقع راته برابره کړې ده. نوموړي د کمیسیونونو د ترسره کړیو خدمتونو ستاینه وکړه، د پرېکړو په تطبیق یې ټینګار وکړ او دوی ته یې د پوره همکارۍ ډاډ ورکړ.
