د لغمان ولایت له بېلابېلو قومي مشرانو، دیني عالمانو او مخورو سره ناسته!
د سرحدونو او قبایلوچارو وزارت د جرګو او قبایلي چارو د همغږۍ معین ښاغلي الحاج محمد یعقوب احمدزي نن د لغمان ولایت په مرکز مهترلام ښارکې ددغه ولایت له بېلابېلو قومي مشرانو، دیني عالمانو او مخور سره وکتل.
په دې کتنه کې لومړۍ قومی مشرانو په دغه ولایت کې خپلې بېلابېلې ستونزې له ښاغلي احمدزي سره شریکی کړی، دغه راز یې د سولی خبرو اترو، اوربند او شته نظام څخه بشپړ ملاتړ څرګند کړ، او په یو غږ ټولو وویل چی موږ سوله غواړو، د لغمان ولایت خلک سوله خوښونکي دي.
ورپسې د سرحدونو او قبایلو چارو وزارت د جرګو او قبایلي چارو د همغږۍ معین د خپلو خبرو په ترڅ کې وویل: د نظام نشتون د هیچا په ګټه نه دی، موږ اوتاسو باید له خپل موجوده نظام څخه حمایت وکړو باید د خپلو امنیتي او دفاعي ځواکونو تر څنګ ودریږو، او د سولی راوستلو لپاره په ګډه کار وکړو، ښاغلي احمدزي دغه راز دوی ته ډاډ ورکړ، چې ستونزې به يې د حل په موخه له اړوندو چارواکو سره شریکي کړي.
همدا راز ښاغلي احمدزي ددغه ولایت د سرحدونو او قبایلو چارو آمریت له کارکوونکو سره هم وکتل او د کارونو ارزونه یی وکړه، د دوې ستونزې یې واورېدې او د چارو د ښه سمون او بهبود په اړه یې لازمې لارښوونې وکړې.
