د غصب د مخنيوي او غصب شویو ځمکو د استرداد کمېسیون یوه هیئت کندهار ولایت ته سفر وکړ
د سرحدونو، قومونو او قبايلو چارو وزارت د سرحدي پلټنو معين او د غصب د مخنيوي او غصب شویو ځمکو د استرداد کمېسیون غړي الحاج مولوي محمد اسماعیل غزنوي د یوه هیئت په مشري کندهار ولايت ته د خپل سفر په ترڅ کې په کندهار ولایت کې د تخنیکي هیئت له يو شمېر غړو سره لېدنه وکړه او د غصب د مخنيوي په برخه کې يې د دوى د تر سره شويو فعاليتونو په اړه معلومات ترلاسه کړل.
په دې ليدنه کې د ياد تخنیکي هیئت غړو د خپلو فعاليتونو په اړه معلومات له ښاغلي غزنوي سره شريک کړل او څرګنده يې کړه چې د دولتي ځمکو او څړځايونو د غصب د مخنيوي او بيرته راګرځېدو پروسه په کندهار ولايت کې په چټکۍ سره روانه ده او په لنډ وخت کې به د ټول ولايت په کچه عملي شي.
په پای کې د سرحدونو، قومونو او قبايلو چارو وزارت د سرحدي پلټنو معين او د غصب د مخنيوي او غصب شویو ځمکو د استرداد کمېسیون غړي او د هیئت مشر الحاج مولوي محمد اسماعيل غزنوي د کندهار ړلایت د تخنیکي هیئت د غړو فعاليتونه وستايل او زياته يې کړه چې د غصب شويو ځمکو د بيرته راګرځېدو پروسه نه يوازې د کندهار، بلکې د ټول هېواد د پرمختګ او د ولسونو د ستونزو د حل لپاره يو مهم ګام دی.
ښاغلي غزنوي همداراز د ياد هیئت غړو ته د لا نورو هڅو او فعاليتونو لپاره لازمې لارښوونې وکړې او هغوی یې وهڅول چې د غصب د مخنيوي په برخه کې دې خپل کارونه نور هم پراخ کړي.
