د عامه تأسیساتو ساتنه دي وشي
څو ورځې وړاندې د کاپیسا ولایت د حس آباد، کچا او سکین ولسوالیو تر منځ د عامو خلکو له لوري د سرک جوړېدلو په جریان کې د خلکو ځینو تأسیساتو ته زیانونه اوښتې وو، چې له امله یې د سیمې د خلکو تر منځ شخړې او اختلافات رامنځ ته شوي وو. د یاد ولایت مقام د هدایت پر اساس د سرحدونو، قومونو او قبایلو رئیس ښاغلي صیاد او د امر بالمعروف نهي عن المنکر رئیس د یادې ستونزې د حل په موخه د کاپیسا ولایت اله سای ولسوالۍ ته سفر وکړ. ټاکل شوي پلاوي د ساحې له لیدلو او بررسي وروسته د یادې ستونزې دواړو ښکېلو لوریو ته د قناعت په ورکولو سره وویل: په کومه ساحه کې چې سرک رغول کیږي هلته دي د عامه تاسیساتو (ونو، باغونو او کورونو) ساتنه وشي او له حوصلې دې کار واخیستل شي. یاد پلاوي د قضیې تر پوره مطالعې او څارنې وروسته دواړو لوریو ته قناعت ورکړ او خپله ټاکل شوې پرېکړه یې دوی ته واوروله چې د دواړو له لوري په خوشحالي سره ومنل شوه. د یادولو وړ ده چې د یاد سفر په جریان کې په اله سای ولسوالۍ کې د دوو تنو تر منځ راپېښه شوې شخړه هم په سوله بدله شوه او د یادې شخړې دواړه لوري وروسته له پخلا کېدولو یو بل ته غاړه غړۍ شول او په خپله شخړه یې پښېماني وښوده.
