د سرحدونو او قبایلو چارو وزیر محترم محب الله صمیم بلخ ولایت ته د خپل رسمي سفر په ترڅ کې د شمال زون د ترکمنو پيوستون شورا له مشرتابه او غړو سره وکتل.
د سرحدونو او قبایلو چارو وزیر نن جمعه د شمال زون د ترکمنو پيوستون شورا په هغه غونډه کې برخه واخیسته، چې د شمال د ترکمن قوم سلګونو تنو ديني عالمانو، قومي مشرانو، متنفذینو او ځوانانو او ټولنيزو فعالانو په کې ګډون کړی و.
دا غونډه (الي) مدرسه او د (کفایت یورت لیليه) کې، چې د همدې قوم لخوا د خپلو ځوانانو د زده کړو لپاره جوړه شوې، رابلل شوې وه.
په دې غونډه کې د سرحدونو چارو وزیر په خپلو خبرو کې وویل زده کړې مو له سیالانو سره سیالوي او د اففانستان اسلامي جمهوریت ژمن دی ، چې شپه او ورځ کار وکړي تر څو ټولو خلکو په تېره بيا ځوانانو ته د زده کړو زمینه برابره کړي.
ښاغلي صمیم په خپلو خبرو کې زیاته کړه: د سرحدونو او قبایلو چارو وزارت د ټولو قومونو ګډ کور دی او دا زموږ مسؤلیت دی چې ټولو قومونو سره له نیږدې کار وکړو او ټول په ګډه له خپلو ارزښتونو دفاع او ساتنه وکړو.
د سرحدنو او قبایلو چارو وزیر بلخ ولایت ته د خپل رسمي سفر په ترڅ کې له ولسونو او د بېلابېلو قومي مشرانو سره لیدنې لري.
