د سرحدونو او قبایلو چارو وزیر محترم محب الله صمیم او ورسره مل پلاوی یې خوست ته ورسېد!
1399/11/25
د خوست والي تورنجنرال مهمند کټوازی، ددغه ولایت امنیه قوماندان، د ولایتي شورا رئیس، د ولایتي ادارې ځینو چارواکو، ګڼو قومي مشرانو، مخورو، ټولنیزو فعالانو او ځوانانو ښاغلي وزیر ته ښه راغلاست او هرکلی ووایه.
د سرحدونو او قبایلو چارو وزیر لومړی د ولایت مقام ته ولاړ، او ددغه ولایت له والي سره يې وکتل.
په دې کتنه کې د سرحدونو او قبایلو چارو وزیر ښاغلي محب الله صمیم دغه ولایت د خپل سفر په اړه لنډ معلومات ورکړل وی ویل: خوست ته زموږ د سفر موخه په دغه ولایت کې له بېلابېلو قومي مشرانو، سیمه ایزو چارواکو، مخورو سره له نږدې کتل دي تر څو ستونزې يې واورو او له اړوندو ادارو سره يې شریکې کړو .
ښاغلي صمیم زیاته کړه: په دې ولایت کې لاهم قومي جوړښتونه شته او د سرحدونو او قبایلو چارو وزات نېغ په نېغه له قومونو سره کار کوي، نوموړي د خوست والي او ولایتي ادارې ته ډاډ ور کړ، چې د خپل همدې سفر په ترڅ کې به ځینو ستونزو ته رسیدګي کوي او له قومي مشرانو سره به په ګډه ورته حل لارې مومي.
ټاکل شوې ده د سرحدونو او قبایلو چارو وزیر د خپل سفر په ترڅ کې په هغې لوې ولسي جرګه هم برخه واخلي او وینا وکړي، چې د سولې او اوربند دټینګښت او د هېواد له امنیتي او دفاعي ځواکونو څخه د ولسونو د ملاتړ تر عنوان لاندې په دغه ولایت کې جوړیږي .
