د ستراتيژیک پلان تطبیق لپاره د اغېزمن میکانیزم په جوړولو ټینګار وشو!
په هغې غونډه کې، چې له همدې امله نن د سرحدونو او قبایلو چارو وزارت د مسلکي معین ښاغلي محمد آصف ننګ په مشرۍ او د یو شمېر رئیسانو او آمرینو په ګډون جوړه شوې وه، د ستراتيژیک پلان د تطبیق لپاره د یوه ځانګړي میکانیزم په جوړلو ټینګار وشو.
د غونډې په پیل کې د پلان او پالیسۍ ریاست استازي ښاغلي دوست الرحمان د ستراتيژیک پلان د تطبیق، او د دریو او شپږو میاشتو لپاره د علمیاتي پلانونو د جوړولو په اړه پرېزنټیشن وړاندې کړ او له اړوندو ریاستونو څخه یې غوښتنه وکړه، چې په دې برخه کې د پلان له ریاست سره بشپړه همکاري وکړي.
ورپسې اړوندو ریاستونو د موضوع په اړه خپل نظریات شریک کړل: ژمنه یې وکړه، چې موږ به په دې برخه کې بشپړه همکاري وکړو.
همدا راز مسلکي معین ښاغلي ننګ د پلان او پالیسۍ ریاست ته لارښوونه وکړه، چې د ستراتيژیک پلان د تطبیق لپاره پر یو داسې اغېزمن میکانیزم کار وکړي، چې پکې د پرمختګ سلنه، د فعالیتونو پروګرس، اجراات او د فعالیتونو د ځنډېدو لاملونه په ډاګه شوي وي.
مسلکي معین دغه راز د غونډې له ټولو ګډونوالو څخه غوښتنه وکړه، چې په دې برخه کې باید هره اوونۍ کاري غونډه وکړو، ترڅو چارې په ښه توګه ترسره شي.
