د سادات قوم له استازو سره د دوه اړخیزه همکاریو ژمنه!
۱۴۴۶/۱/۲
دوشنبه د سرحدونو، قومونو او قبایلو چارو وزارت د جرګو او قبایلي چارو د همغږۍ مرستیال مولوي محمد علي جان احمد د بدخشان، بلخ او کُنړ ولایتونو د سادات قوم له مشرانو او دیني عالمانو سره د کتنې پرمهال د دوه اړخیزه همکاریو ژمنه کړې. په دغه کتنه کې د قوم استازو د اسلامي نظام خدمت ته خپله ژمنتیا وښوده، اتفاق او وحدت یې د ټولې افغاني ټولنې د بریا راز وباله. دوی د قومونو د اتحاد په برخه کې د اسلامي امارت په خاصه توګه د دغه وزارت د کړنو ستاینه وکړه او له ولس سره د لا ښې همغږۍ او ملاتړ په موخه د جوړېدونکې غونډې په اړه یې سلا و مشورې وکړې. راغلي مشران په دغه برخه کې د ځینو اسانتیاوو برابرولو غوښتونکي شول. د جرګو او قبایلو چارو د همغږۍ مرستیال ښاغلي احمد سادات یو روحاني او علمي قوم یاد کړ ویې ویل: سادات هم د نورو افغان قومونو په څېر زموږ د هیواد یو د قدر وړ قوم دی چې هر وخت د اسلامي نظام تر څنګ درېدلي او له هیڅ راز ملاتړ او تعاون څخه یې ځانونه نه دي سپمولي. نوموړي راغلیو مشرانو ته ډاډ ورکړ چې له دوی سره به په ټولو اړوند چارو کې پوره همکاري او لاسنیوی کوي.
