د دایکندي ولایت د دوو کورنیو تر منځ شخړه حل شوه
د دایکندي ولایت د سرحدونو، قومونو او قبایلو چارو امریت په همغږۍ د یاد ولایت په مرکز کې د دوو کورنیو تر منځ د ځمکې پر سر رامنځته شوې شخړه د یوې غونډې په ترڅ کې حل و فصل شوه. د یادې غونډې پر مهال د یاد ولایت د سرحدونو، قومونو او قبایلو چارو آمر حافظ محب الله سجاد، ځینو مسؤلینو او د سیمې مشرانو حضور درلود. د ناستې په پیل کې د مشرانو له لوري دواړو لوریو ته د خپلمنځي شخړې او جنجال د ختمولو په اړه خبرې وشوې او د اسلام دمبارک دین د ارشاداتو پر بناء یې ټول مسلمانان یو د بل وروڼه یاد کړل او دواړه لوري یې سولې ته را وبلل. وروسته د یاد ریاست آمر ښاغلي سجاد وویل: د خلکو تر منځ هماهنګي راوستل او د یووالي لوري ته رابلل د دوی مسؤلیت دی او د دغه آمریت دروازه د هیواد د ټولو قومونو پر مخ خلاصه ده. نوموړي همدا راز زیاته کړه: موږ همېشه کوښښ کوو چې د دایکندي ولایت د قومونو تر منځ د یووالي، وروولۍ او همغږۍ لپاره کار وکړو.
