د خوشحال خان له عالی لیسې څخه لیدنه
د سرحدونو، قومونو او قبایلو چارو وزارت د دعوت او ارشاد رئیس الحاج مفتي شفیع الله ثاقب او مل پلاوي د خوشحال خان عالي لېسې له زده کوونکو او اداري کارکوونکو سره وکتل. په دغه کتنه کې د دعوت او ارشاد رئیس ثاقب د خپلې هر اړخیزې وینا په ترڅ کې د ایمان او عقیدې په اړه خبرې وکړې او زده کوونکو ته یې په نبوي سیرت او صورت دځانونو برابرولو، پاکوالي، په خپلو زده کړو کې د کوښښ کولو او نیکو اخلاقو یادونه وکړه. نوموړي زده کوونکي اتحاد، اتفاق، مینې او ورورولۍ ته راوبلل او دوی یې د دې هیواد او ملت راتلونکي یادکړل. هغه له زده کوونکو څخه وغوښتل چې د خپل ملت د خدمت لپاره دي خپلو زده کړو ته ادامه ورکړي او له سیاسي او تنظیمي کړنو دي ځان وساتي. د لېسې زده کوونکو ته د یاد ریاست له لوري په کاغذونو لیکل شوې دوعاګانې او څو عدده قرآن عظیم الشانونه د تحفې په ډول ورکړل شوو. د يادې لېسې له استادانو سره په ځانګړې ناسته کې ورغلي پلاوي د زده کوونکو پر عقيدوي اصلاح ټينګار وکړ او د وزارت د رهبري هئيت لازمې سپارښتنې يې ورته واورولې. څو تنو استادانو د نورو په نمايندګي مل پلاوي ته په ياده برخه کې ډاډ ورکړ او ويې ويل چې لله الحمد زموږ د لېسې زده کونکي د تېر کال په پرتله ښه شوي دي او هڅه کوو چې لا يې خپلو نيمګړتياوو ته متوجه کړو. یادو استادانو د خپلو هڅو په برخه کې وويل چې د خوشحال خان د عالي لېسې زده کونکي هر کال د کانکور په ازموينو کې د نورو دولتي لېسو په پرتله لوړې نمرې اخلي او ښو پوهنځیو ته بریالي کیږي چې دا د هیواد د بچیانو د روزلو په برخه کې یو نېک ګام دی.
