د خوست ولایت د یووالي ګډ کمېسیون له مشر او غړو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې مخکې د خوست ولایت د یووالي ګډ کمېسیون له مشر ښاغلي سلطان محمد ایوبي او غړو سره د خپل کار په دفتر کې وکتل.
په دې کتنه کې د یاد کمېسیون مشر د خپلو خبرو په ترڅ کې د سرحدونو او قبایلو چارو له وزیر ښاغلي صمیم څخه مننه وکړه، چې څو ورځې مخکې یې خوست ولایت ته رسمي سفر کړی وه او د یاد ولایت د ولسونو او قومونو ستونزې یې له نږدې واورېدې او د اړوندو ادارارو سره یې د حل په موخه شریکې کړې.
نوموړي دغه راز د سولې په اړه هم خپل نظریات، وړاندیزونه او غوښتنې شریکې کړې وې ویل: د خوست ولسونو تل له موجوده نظام څخه ملاتړ کړی او قربانۍ یې ورکړي، ترڅو په هېواد کې تلپاتې او باعزته سوله ټینګه شي.
دوی دغه راز د سرحدونو او قبایلو چارو وزارت د قومي جوړښتونو په برخه کې یو مهم وزارت یاد کړ او ټینګار یې وکړ، چې په ملي مسایلو کې دې د قومي مشرانو، دیني عالمانو، مخورو او ځوانانو سره سلامشورې وشي، په دې برخه کې دې ټول مشران سره همغږي اوسي، د دوی غوښتنو ته دې لومړیتوب ورکړل شي، ځکه چې دا هېواد له قومونو جوړ دی او تل همدي قومونو ساتلی دی.
ورپسې ښاغلي محب الله صمیم په خپلو خبرو کې د راغلو مشرانو له ملي احساس څخه د مننې په ترڅ کې وویل: د نظام د پایښت، د ملي ګټو د ساتلو، د امنیتي او دفاعي ځواکونو څخه د ملاتړ او د قومونو ترمنځ د انسجام په برخو کې د خوست ولایت د ولسونو هڅې او لاسته راړونې د ستایلو وړ دي او تل یې په دې لاره کې قربانۍ ورکړي دي.
ښاغلي صمیم زیاته کړه، سوله د ټولو افغانانو هیله ده، داسې سوله چې په کې لاسته راوړنې، ملي ارزښتونه او د خلکو حقوقو خوندي وي، خو دا هغه وخت شونې ده، چې قومي مشران، د شوراګانو استازي او مدني ټولنې یې غوڅ ملاتړ وکړي، د خپل نظام ترڅنګ ودریږي او په یو غږ د سولې او تلپاتې اوربند غوښتنه وکړي.
د سرحدونو او قبایلو چارو وزیر دا هم وویل: دا هېواد د ټولو ګډ کور دی او د آبادولو لپاره یې باید ټول سره لاس په کار شو او د د ښمن ناوړو موخه ته د تل لپاره د پای ټکی کېږدو.
