د خلکو استازي او قومي مشران کولای شي، چې سولې او ثبات ته ولسونه وهڅوي!
دغه څرکندونې د سرحدونو او قبایلو چارو وزیر ښاغلي محب الله صمیم نن له غرمې وروسته په ولسي جرګه کې د خوست او کنړ ولایتونو د خلکو له استازو ښاغلي کمال ناصر اصولي، ښاغلي نعمت الله کریاب او یوشمېر قومي مشرانو سره د کتنې په ترڅ کې وکړې.
په دې کتنه کې راغلو استازو او قومي مشرانو د خپلو سیمه ییزو ستونزو شریکولو ترڅنګ وویل: موږ به تل له وزارت سره همکاري کوو او د خپلو درنو مشرانو او دیني عالمانو په سلا مشورو سره به په خپلو سیمو کې د ملي پروژو د پلي کولو، د جرګو او مرکو له لارې د سولې د ټينګښت لپاره هڅې ، د خپلو امنیتي - دفاعي ځواکونو څخه بشپړ ملاتړ او په دې برخو کې به نه ستړې کیدونکې هلې ځلې وکړو.
ورپسې ښاغلي محب الله صمیم د خپلو خبرو په ترڅ کې وویل: د خلکو استازي او قومي مشران د دې هېواد مهم شخصیتونه دي، موږ باید په مهمو پرېکړو کې د دوی سلامشورې واورو او له تجربو څخه یې ګټه پورته کړو، ځکه چې تاسو درانه مشران کولای شئ، چې سولې او ثبات ته ولسونه وهڅوئ.
