د بېلابېلو ولایتونو له قومي مشرانو، مخورو، دولتي چارواکو او ځوانانو سره کتنه!
د سرحدونو او قبایلو چارو سرپرست او نوماند وزیر ښاغلي محب الله صمیم د روان لمریز کال د وږي میاشتې پر ۳۱ مه نېټه د بېلابېلو ولایتونو له قومي مشرانو، مخورو، دولتي چاروکو او ځوانانو سره د خپل کار په دفتر کې وکتل.
په دې کتنه کې، چې د وزارت د جرګو او قبایلو چارو د همغږۍ معین ښاغلی محمد یعقوب احمدزی، مالي او اداري معین ښاغلی شجاع الملک جلاله خان او د سرحدي څېړنې میعن ښاغلی ډاکټر محمد آصف قاضي زاده هم حاضر وو، راغلو مشرانو ښاغلي محب الله صمیم ته د مبارکي ویلو ترڅنګ د موجوده نظام څخه بشپړ ملاتړ څرګند او خپلې یو لړ سیمه ییزې ستونزې یې د حل په موخه د وزارت له مشرتابه سره شریکې او د هر راز همکاریو ډاډ یې ورکړ.
ورپسې د سرحدونو او قبایلو چارو سرپرست او نوماند وزیر ښاغلي محب الله صمیم په خپلو خبرو کې د راغلو مشرانو له راتګ څخه خوښي څرګنده کړه او د دوی ستونزې پر ځای وبللې وې ویل: هڅه به مې دا وي، چې د قومي مشرانو سره کېنم، د دوی ستونزې له نږدې واورم، سلامشورې یې له ځان سره ولرم، ترڅو د دې هېواد خلکو ته د خدمت جوګه شم.
