د بغلان ولایت له قومي مشرانو او عالمانو سره کتنه
پنجشنبه ۱۴۴۶/۵/۱۹
د سرحدونو، قومونو او قبایلو چارو وزیر الحاج ملا نورالله نوري نن مخکې له غرمې د بغلان ولایت له قومي مشرانو او دیني عالمانو سره په خپل کاري دفتر کې وکتل. د دغې کتنې پرمهال د بغلان ولایت له مختلفو ولسوالیو څخه راغلیو سیمه ییزو مشرانو او علماء کرامو اسلامي نظام د خدای تعالی ﷻ یوه لویه پیرزوینه وبلله او په خپلو سیمو کې یې د یو لړ ستونزو د حل ترڅنګ یادونه وکړه چې د بغلان ولایت مرکز دي بیرته خپل پخواني ځای ته یووړل شي تر څو د خلکو د غوښتنو او اړتیاوو په پوره کولو کې اسانتیا رامنځته شي.
د قومي مشرانو او علماوو ترخبرو وروسته ښاغلي نوري مشرانو ته ښه راغلاست او هرکلی ووایه، زیاته یې کړه: موږ ستاسې ستونزو ته متوجه یو او ستاسې ستونزې مو د ریاست الوزراء او د اميرالمؤمنين حفظه الله تر مقام پورې رسولې دي. نوموړي قومي مشرانو ته د ډاډ په وړاندې کولو سره وویل: موږ هڅه او کوښښ کوو چې نه یوازې ستاسې ستونزې او غوښتنې پوره کړو بلکې د افغانستان د هرې سیمې خلکو ته پاملرنه وکړو او ژر تر ژره یې مشکلاتو ته حل لارې ولټوو.
