د بایزید روښان د لوړو زده کړو مؤسسې له رئیس سره ناسته!
د سرحدونو او قبایلو چارو وزیر ښاغلي محب الله صمیم نن له غرمې مخکې د بایزید روښان د لوړو زده کړو مؤسسې له مشر ښاغلي مېرزا محمد صافي سره د خپل کار په دفتر کې وکتل او د دواړو ادارو ترمنځ په ګډو همکاریو ټینګار وشو.
په دې کتنه کې ښاغلي صافي د بایزید روښان لوړو زده کړو مؤسسې د فعالیتونو په اړه د معلومات وړاندې کول ترڅنګ د وزارت اړوندو لېسو زده کوونکو او قبایلو ځوانانو ته په ځانګړي تخفیف سره د لوړو زده کړو ترسره کولو په موخه د زمینې برابرولو ژمنه وکړه.
ښاغلي صافي په خپلو خبرو کې وویل: زموږ هڅه دا ده، چې خپلو هېوادوالو ته د زده کړې ښه چاپیریال رامنځته کړو، ترڅو دوی وکولای، چې د دی فرصت نه ګټه واخلي او خپل هېواد ته د رښتیني خدمت جوګه شي.
ورپسې ښاغلي محب الله صمیم د خپلو خبرو په ترڅ کې د ښاغلي مېرزا محمد صافي څخه مننه وکړه، چې یو ښه اکاډمیک چاپیریال یې رامنځته کړی.
ښاغلي صمیم زیاته کړه، په نږدې راتلونکي کې به د یاد بنسټ له مشر سره د وزارت د اړوندو لېسو زده کوونکو او قبایلو ځوانانو ته د لوړو زده کړو په موخه د دوه اړخیزو همکاریو او د اړیکو پیاوړتیا هوکړه لیک لاسلیک کړو.
