د بامیان، غزني او میدان وردګ ولایتونو له ولسي استازو سره کتنه
۱/۱۱/۱۴۴۵
د بامیانو، غزني او میدان وردګ ولایتونو ولسي مشرانو د سرحدونو، قومونو او قبایلو چارو وزارت د جرګو او قبایلو چارو له مرستیال مولوي محمد علي جان احمد سره د هغه په کاري دفتر کې وکتل. د لیدنې په ترڅ کې راغلیو مشرانو د اسلامي امارت د مسؤلینو له لوري د ترسره شویو خدمتونو ستاینه وکړه او د خپلو ولایتونو اړوند ستونزې یې شریکې کړې. دوی د کرنیزو ځمکو د ورکړې، د کوچیانو د څړځایونو د تثبیت او د خپلمنځي شخړو د حل په برخه کې د پاملرنې غوښتنه وکړه او د قومونو ترمنځ د اتحاد او یووالي په اړه یې ډاډ څرګند کړ. ورپسې د جرګو او قبایلو چارو د همغږۍ معین ښاغلي احمد د قومي مشرانو تر منځ په ولسي یووالي او اتحاد خوښي څرګنده کړه ویې ویل: نن لله الحمد د خلکو تر منځ نفرتونه ختم شوي او د یووالي فضاء ده. هغه زیاته کړه: اتحاد د ملتونو د بري لار ده، هغه کسان چې نفاق خپروي په دې خاوره کې به هیڅکله ځای پیدا نه کړي. نوموړي د ولسونو ستونزې د پام وړ وبللې او په یادو برخو کې یې د پوره همکارۍ ډاډ ورکړ.
