د امن او ثبات دوره ورځنی ملي کنفرانس نن دوشنبه د۱۳۹۹لمریزکال د کب پر۱۸مه نېته په ارګ کې په بریالیتوب سره پای ته ورسېد!
په دې کنفرانس کې چې له خېبرپښتونخوا او سویلي پښتونخوا څخه یو شمېر سیاسي او فرهنګي مشرانو او مېرمنو ګډون کړی وو، د افغانستان اسلامي جمهوریت جمهور رئیس جلالتمآب محمد اشرف غني هم ګډون او وینا وکړه.
د سرحدونو او قبایلو چارو وزیر ښاغلي محب الله صمیم وویل: په کنفرانس کې پر دې بحث وشو چې د ډیورنډ کرښې دواړو لوریو ته جګړه څه ډول پایته ورسېږي او ولسونه په سوله او ثبات کې ژوند وکړي.
ورپسې د عوامي ملي ګوند غړي غلام احمد بلور د ډیورنډ کرښې دواړو لوریو جګړې ته په اشارې وویل، دغه جګړه اسلامي او مذهبي اساس نه لري او یوازې د افغانانو د پرمختګ، ارام ژوند او سوکالۍ پر ضد روانه ده.
غلام احمد بلور وویل، د افغانستان د اوسنۍ ستونزې د حل لپاره دې د حکومت په کچه له ګاونډیو او د سیمې هیوادونو سره دوامداره خبرې وشي او ټینګار یې وکړ، تر هغو چې په اساسي ډول د وسله والو د تجهیز او تمویل مخه ونه نیول شي، جګړه پای ته نشي رسېدای.
همداراز د سویلي پښتونخوا سیاسي او ټولنیز شخصیت ملک عبدالمجید په خپلو خبرو کې د ډیورنډ کرښې دواړو لوریو ته د سوداګرۍ پر زیاتوالي، د امن او ثبات لپاره د اغېزناکو هڅو پر دوام او د ټوپک پر ځای زده کړو ته د زمینې پر برابرولو ټینګار وکړ.
جمهوررئیس غني د هغوی د خبرو تر اورېدو وروسته وویل: افغان حکومت ژمن دی روان ناورین په اساسي ډول پایته ورسوي دغه راز یې د امن او ثبات لپاره د پښتونخوا مشرانو او پښتون ژغورنې غورځنګ هڅې او قربانۍ وستایلې . د سولې پروسې ته یې په اشارې وویل، پاکستان باید دغه نااعلان شوې جګړه پای ته ورسوي او ازاد، مستقل او ډیموکراتیک افغانستان ومني.
جمهوررئیس د ډیورنډ کرښې دواړو لوریو ته د مېشتو ولسونو په ژوند کې د اساسي تغییراتو لپاره د سوداګرۍ پر زیاتوالي ټینګار وکړ وې ویل، د دواړو غاړو سوداګر دې ګډه ترانسپورټي کمپنۍ جوړه کړي او موږ ورسره بشپړه همکاري کوو.
جمهوررئیس د سرحدونو او قبایلو چارو وزارت ته لارښوونه وکړه چې د مشهور پښتون فلسفي شاعر غني خان د مقبرې د اساسي بیارغاونې لپاره هڅې پیل کړي.
د غونډې په پای کې د امن او ثبات سیمه ییز کنفرانس پرېکړه لیک ولوستل شو چې په کې په ډیورنډ کرښه د سوداګرۍ پر زیاتوالي او افغان سولې څخه چې په کې اساسي قانون، د ښځو او اقلیتونو حقوق او د تېرو دوو لسیزو لاسته راوړنې خوندي وي، ملاتړ وشو.
