تاسو د هېواد د راتلونکي جوړوونکي یاست!
دغه خبره د سرحدونو او قبایلو چارو سرپرست او نوماند وزیر ښاغلي محب الله صمیم نن سه شنبې د روان لمریز کال د تلې میاشتې پر ۸ مه نېټه د وزارت د اړوندو لېسو له زده کوونکو سره د کتنې په ترڅ کې وکړه.
په دې کتنه کې، چې د وزارت مالي او اداري معین ښاغلی شجاع الملک جلاله خان او د ښوونې او روزنې رئيس ښاغلی محمد نبي شهاب هم حاضر وو، ښاغلي محب الله صمیم په خپلو خبرو کې زده کوونکو ته وویل: وزارت ژمن دی، چې تاسو ته د زده کړې مناسب چاپېریال برابر کړي، ځکه دا هېواد ستا سو په هلو ځلو او زیار ګالنو جوړیږي، مخته ولاړشې، خپلو زده کړو ته دوام ورکړې، ځکه چې تاسو د هېواد د راتلونکي جوړوونکي یاست.
