بلخ کې د ۳۵ کلنې حقوقي شخړې حل
چهار شنبه ۲۴ ذوالحجة الحرام ۱۴۴۷
د بلخ ولایت د سرحدونو قومونو او قبایلو چارو رئیس مولوي سردار محمد محمدي په مشري د ديني عالمانو، متنفذینو، مخورو سپین ږیرو او ولايتي ادارې د مشرانو په حضور کې د دې ولایت چهارکنت ولسوالۍ آبدرې سیمې اوسیدونکو ترمنځ ۳۵ کلنه شخړه پای ته ورسېده.
ياده اوږدمهاله شخړه، چې د څو جريبه ځمکې د ملکيت پر سر راپورته شوې وه د دواړو خواوو ترمنځ يې د پراخو ستونزو سر بېره ګڼ مالي تاوانونه هم اړولي وو، چې وخت ناوخت به يې ترمنځ فزيکي اخ و ډب هم رامنځته کېده.
مسؤلينو د يادو جنجالونو د پای ته رسولو په موخه لومړی په هر اړخېزه توګه موضوع وڅېړله او بيا يې د قومي مشرانو او علماوو په شتون کې يوه ګډه جرګه راوبلله، چې په همدې توګه يې د يوې شرعي فيصلې په ترڅ کې حق حقدار ته وسپاره.
