د سولې او ملي يووالي په ټينګښت کې د سرحدونو او قبايلو چارو د وزير هلې ځلې وستايل شوې!
د هېواد ولسمشر جلالتماب ډاکټر محمد اشرف غني د سرحدونو او قبایلو چارو له وزير محترم محمد شفیق ګل آغا شېرزي سره په داسې حال کی، چې د پاکستان په چارو کې د ولسمشر ځانګړی استازي ښاغلي محمد عمر داودزي هم حاضر و٫ د ولسمشري په ماڼۍ کې وکتل.
په دې ناسته کی لومړى جلالتماب ولسمشر په هېواد کې د سولې دټينګښت, قومونو په انسجام او بيا رغونې په برخو کې د سرحدونو او قبايلو چارو وزارت هلې ځلې وستايلې.
دغه راز د هېواد پر روان وضعيت٫ د سولې پر روانو هڅو، شته فرصتونو، ښې حکومتولي او د هیواد پر نورو مهمو موضوعګانو باندې لازم بحثونه او په دې برخه کې پر ګډ کار او همغږۍ ټینګار وشو.
همداراز ښاغلي ګل آغا شېرزي په خپلو خبرو کې وويل: د سولې او امنيت په ټينګښت او ښې حکومتولی په لار کې به خپلو هڅو ته دوام ورکوي او موږ کولاى شو د قومي ظرفيتونو ، مخورو او با نفوذه شخصيتونو له نفوذ څخه په استفادې سره په دې برخه کې مهم رول ولوبوو.
