((چا چې شل کاله د افغانستان غیور ولس ته د خپلو شومو موخو امتحان ورکړی، هغه څېرې دې د ازاد او خپلواک افغانستان د ازادۍ چیغې نه وهي ))

شنبه ۱۱ محرم الحرام ۱۴۴۸ هـ.ق

د سرحدونو، قومونو او قبایلو چارو وزیر ملا نورالله نوري، سرپل ولایت ته د خپل سفر په ترڅ کې د یاد ولایت د کوهستاناتو په سیمه کې له ولسونو سره د یووالي او همغږۍ په نوم یوې ولسي غونډې ته چې د سرپل او سمنګان ولایتونو واليانو، ځایي مسؤلینو، دیني علماوو او ولسي خلکو پکې ګډون درلود وینا وکړه.

ښاغلي نوري د خپلې وینا په ترڅ کې وویل: په اسلامي نظام کې د افغانانو عقیده، تاریخ، حریت، او نوامس خوندي دي، زیاته یې کړه، چا چې شل کاله د افغانستان غیور ولس ته د خپلو شومو موخو امتحان ورکړی، هغه څېرې دې د ازاد او خپلواک افغانستان د ازادۍ چیغې نه وهي، نوري څرګنده کړه چې د افغانستان ولسونه له اسلامي امارت سره په زور نه دي ولاړ، بلکې د عقیدې، فکر، کلتور او سیاست له مخې د اسلامي نظام تر څنګ ولاړ دي.

بلخوا ګډونوالو د اسلامي نظام د لا استحکام او ولسي یووالي په پیاوړتیا ټینګار وکړ او زیاته یې کړه چې حاکم نظام د افغانانو لپاره کورنی مشروعیت لري او هغه کسان چې د اسلامي نظام پر ضد توطیې جوړوي، ولس ته د منلو وړ نه دي، دوی زیاته کړه موږ د خپل اتحاد په مټ دا نظام ساتو او هیڅ چاته اجازه نه ورکوو، چې شته امن اخلال او د افغانستان په داخلي چارو کې لاسوهنه وکړي.