په ولسي جرګه کې د خلکو له استازو سره کتنه!
د سرحدونو او قبایلو چارو وزیر ښاغلی محب الله صمیم نن له غرمې وروسته په ولسي جرګه کې د بدخشان او تخار ولایتونو د خلکو له استازو ښاغلي عبدالولي نیازي، ښاغلي عبدالروف انعامي او اغلې استاد نظیمې یوسفي بیک سره د خپل کار په دفتر کې وکتل.
په دې کتنه کې د خلکو استازو د خپلو سیمه ییزو ستونزو شریکولو ترڅنګه د قومونو په یووالي او انسجام کې د وزارت رول مهم وګڼلو وې ویل: موږ به د خپلو خلکو د استازو په توګه د سرحدونو او قبایلو چارو له وزارت سره د قومونو د اړیکو په پراختیا، د ملي پروژو په تطبیق، د سولې او ثبات په برخه کې هڅو او همکارۍ ته ولسونه راوبولو او په دې برخه کې به خپلې هلې ځلې ونه سپموو.
ورپسې د سرحدونو او قبایلو چارو وزیر ښاغلي محب الله صمیم پخپلو خبرو کې د یادو استازو د هېوادني احساس څخه مننه وکړه، وې ویل: موږ د پتمنو قومونو د یووالي غوښتونکي یو او دا زموږ مسوولیت دی، چې د خپلو خلکو لپاره کار وکړو، ځکه چې ستاسو په شان استازي کولای، شي چې د ملت او دولت ترمنځ واټن را لنډ کړي.
