په هېواد کې د قومي جوړښتونو پیاړوي کول مو له کاري لومړيتوبونو څخه دي!
دغه څرګندونې د سرحدونو او قبایلو چارو وزیر ښاغلي محب الله صمیم نن له غرمې وړاندې د غزني ولایت څخه راغلو مشرانو سره په کتنه کې وکړې.
په دې کتنه کې راغلو قومي مشرانو په هېواد کې د تلپاتې او باعزته سولې د ټینګښت او غوښتنې ترڅنګ، خپلې یو لړ سیمه ییزې ستونزې، وړاندیزونه او غوښتنې د حل په موخه د وزارت له مشرتابه سره شریکې کړې او هر راز همکاریو ډاډ یې ورکړ.
ورپسې ښاغلي محب الله صمیم له یادو مشرانو څخه مننه وکړه، چې تل یې له نظام څخه ملاتړ کړی او په خپلو سیمو کې یې د پراختیایي پروژو او د حکومت له پروګرامونو د تطبیق په برخو کې همکاري کوي.
دغه راز ښاغلي صمیم یادو مشرانو ته وویل: چې دا نظام له تاسو او ستاسو په قربانیو جوړ دی او تل مو د همدې نظام ملاتړ کړی چې موږ مو منندوی یو، د قومي جوړښتونو په پیاوړي کولو کې به له درنو قومونو سره اوږه په اوږه کار وکړو او ستونزې به مو د حل په موخه له اړوندو ادارو سره شریکې کړو.
