د سرحدونو، قومونو او قبايلو چارو وزارت لخوا د دايکندي له ولسونو سره پراخه ولسي غونډه وشوه
چهارشنبه ۱۲ صفرالمظفر ۱۴۴۷ نن له غرمې وړاندې د دايکندي ولايت له ولايتي مسؤلينو، د بېلابېلو ولسواليو له استازو، قومي مخورو او عامو ولسي خلکو سره د ياد وزرات د جرګو او قبايلو چارو د همغږۍ مرستيال الحاج مولوي محمد علي جان احمد په مشري د ملت اتحاد، د اسلامي نظام بقاء او د ولسونو د هوساينې تر عنوان لاندې غونډه ترسره شوه. پيل کې د اطلاعاتو او عامه اړيکو رئيس مفتي تسليم الله حقاني په هيواد کې د ازادۍ بل څراغ د شل کلنو قربانيو او ولسي ملاتړ نتيجه وبلله ويې ويل: اوس د سولۍ او ابادۍ لپاره ګامونه پورته شوي او موږ د يو روښانه سبا په جوړولو بوخت يو. ورپسې قومي مشرانو د سرحدونو، قومونو او قبايلو چارو وزارت له رهبري په مننې کولو سره څرګنده کړه، چې دا وزارت د ولسي ستونزو په حل کې تل د ولس ترڅنګ ولاړ دی. دوی همداراز د اسلامي امارت په دوامداره ملاتړ ټينګار وکړ ويې ويل: د اسلامي نظام په سیوري کې د دایکندي ولسونو د سولې او ورورولۍ ساه اخېستې او په هر قيمت يې ساتنې ته چمتو دي. د غونډې په اوږدو کې د وزارت د جرګو او قبايلي چارو د همغږۍ مرستيال الحاج مولوي محمد علي جان احمد، د دايکندي ولایت په ولسونو غږ وکړ، چې د اسلامي نظام د دښمنانو په پيژندلو کې دقيق و اوسي او هېڅ کله د هغوی د شومو اهدافو ښکار نه شي. ښاغلي احمد وويل: د تېر حکومت پرمهال ولس له هرې خوا زوريدلی دی؛ خو نن د اسلامي امارت تر چتر لاندې همدا ولس له عدالت، خپلواکي، امنيت او ورورولي برخمن دی. په پای کې د جرګو او قبایلي چارو د همغږۍ رئيس شيخ نيک محمد افغاني اسلامي امارت د افغانانو لپاره د يووالي او برابرۍ ګډ نظام ياد کړ ويې ويل: دا نظام له تعصب او تبعيض پاک دی او دلته د هر وګړي حق خوندي دی. نوموړي د امیرالمؤمنین حفظه الله تعالی د فرمان تر لوستلو وروسته له خلکو وغوښتل، چې ياد فرمان عملي کړي ترڅو له لوړو مصارفو، بې ځايه لګښتونو او ناوړه رواجونو خلاص شي.
