په بادغیس ولایت د دوو قومونو ترمنځ راپېښه شوې شخړه حل شوه
۲۰/۹/۱۴۴۵ هـ ق
د بادغیس ولایت د مرکز اړوند د چکاب کلي او د جوند ولسوالۍ د پیراجي کلي د دوو قومونو تر منځ په کورنۍ موضوع راپېښه شوې شخړه، چې د دواړو قومونو ترمنځ یې سخت اختلافات را منځته کړي وو، د یاد ولایت د سرحدونو، قومونو او قبایلو چارو ریاست، قومي مشرانو او علماء کرامو په منځګړیتوب، د یوې ناستې په ترڅ کې په سوله بدله شوه.
د یادې شخړې د حل په مراسمو کې د سرحدونو، قومونو او قبایلو چارو رئیس مولوي محمد قاسم ضمیر او یاد پلاوي د ښکېلو لوریو په حضور کې د پېښې شوې موضوع په اړه پوره څېړنه وکړه او د مشرانو او علماء کرامو په مشوره یې د دواړو خواوو ترمنځ د سولې پرېکړه ونیوه.
د پرېکړې تر ابلاغ وروسته دواړه لوري راضي شول او ژمنه یې وکړه چې یو بل ته به هیڅ زیان نه رسوي او یو له بل سره به د وروڼو په څېر ژوند کوي.
