په جوزجان کې د کرنیزې ځمکې پر سر د دوو کورنیو شخړه حل شوه
دوشنبه-۳۰/۱/۱۴۴۶
د جوزجان ولایت د منګوټي کلي د میرویس ابدالي او د سرپل ولایت د یوه اوسېدونکي قاري کمال الدین ترمنځ د ۳۰ جریبه کرنیزې ځمکې پر سر شخړه چې په محکمه کې یې دوه نیم کلونه دوام کړی وو او ناحل شوې پاتې وه، تېره ورځ د یاد ولایت د سرحدونو، قومونو او قبایلو چارو ریاست او قومي سپین ږیرو په منځګړیتوب حل او په دوستي بدله شوه. د دغې شخړې د حل پر مهال دواړو لوریو له کوم زور او جبر نه پرته سولې ته غاړه کېښوده، د مصلحینو د پرېکړې پر اساس کمال الدین او ملګرو یې ۷۵۰۰۰۰ اووه لکه پنځوس زره افغانۍ میرویس ابدالي ورکړې ویې ویل: چې وروسته له دې یو پر بل باندې هیڅ ډول دعوه نه لري او د دوروڼو په څېر به یو له بل سره ژوند کوي.
