په باميان او بلخ ولايت کې د جلاجلا شخړو حل
پنجشنبه ۲۵ ذوالحجة الحرام ۱۴۴۷
د بامیان ولایت مرکز اړوند د ملا غلام په سیمه کې د تاجک او هزاره قومونو د څو تنو ترمنځ رامنځته شوې شخړه، چې له امله یې یو تن ټپي شوی و، مسؤلينو د سیمې د مشرانو او مصلحینو په هڅو د يوې رابلل شوې ناستې په ترڅ کې هواره کړه.
د ياد ولایت د سرحدونو، قومونو او قبایلو چارو آمریت مسؤلينو په همدې موخه له دواړو لوريو سره جلا جلا خبرې وکړې، هغوی یې روغې جوړې ته وهڅول او د سوله ييز ژوند د برابرولو په اساس يې يوبل ته ورغاړې وېستل.
همداراز د بلخ ولايت په مرکز کې د دغه ولايت د سرحدونو، قومونو او قبايلو چارو رياست استازو د هغو دوو کورنيو ترمنځ پخلاينه رامنځته کړه، چې د ځينو کورنيو ستونزو له کبله يې له تېر يوه کال راهېسې ګڼ جنجالونه روان وو.
