د سرحدونو او قبایلو چارو وزیر ښاغلي محب الله صمیم نن له غرمې وروسته له سیاسي او قومي شخصیتونو او د افغانستان د جمهوریت غوښتونکو ملي ګوند له مشرې اغلې عادلې بهرام سره د خپل کار په دفتر کې وکتل.

په دې کتنه کې راغلو مشرانو د سرحدونو او قبایلو چارو د وزیر په توګه د ښاغلي محب الله صمیم د ټاکل کېدو له امله مبارکي وویله او خپلې یو لړ سیمه ییزې ستونزې یې د حل په موخه د وزارت له مشرتابه سره شریکې کړې او له وزارت سره یې د خپلو همکاریو ډاډ ورکړ.

ورپسې د سرحدونو او قبایلو چارو وزیر ښاغلي محب الله صمیم په خپلو خبرو کې د راغلو مشرانو ستونزې پر ځای وبللې او ټینګار یې وکړه، چې د خپل ولس لپاره به کار کووم او د دوی ستونزې به له نږدې اورم، هڅه به مې دا وي، چې ستاسو درنو مشرانو په سلامشورو سره به راسپارل شوی مسوولیت سرته رسووم.