غزني ولايت د علي خېلو شورا له مشر، د واغزو شورا مشر او غړو، د پوهنې رياست سرپرستې، د کډوالو چارو رييس او د اوبو چارو تنظيم ادارې له رييس سره د سرحدونو او قبایلو چارو د وزير محترم محب الله صميم لېدنه!
په ياده کتنه کې د عليخېلو شورا مشر ښاغلي محمد اعظم، د واغزو شورا مشر الحاج محمد سعید رحماني، د غزني ولايت د پوهنې رياست سرپرستې اغلې رڼا نجيبي، د کډوالو چارو رئيس ښاغلي احمدي او د اوبو چارو د تنطيم ادارې رئيس ښاغلي عبدالله الله يار په وارسره خبرې وکړې او د خپلو اړوندو ادارو او شوراګانو د کړنو په اړه يې خپل معلومات د سرحدونو او قبایلو چارو له وزیر سره شريک کړل او په اوسنيو حساسو شرايطو کې يې غزني ولايت ته د ښاغلي صميم سفر ګټور او هېله بخښونکی وباله، چې خلکو ته مثبته روحيه ورکوي.
ورپسې ښاغلي محب الله صميم خبرې وکړې وې ويل: غزني ولایت ته زموږ د سفر موخه د امنيتي وضعيت څېړل، د نظام او ملي امنيتي _ دفاعي ځواکونو ملاتړ ته د خلکو د بېلابېلو اقشارو رابلل دي، چې ياد اصل ته په کتو سره مو له تاسو سره لیدنې کتنې او سلا مشورې پيل کړي.
موږ ژمن يو، د ولسونو په بسيج کولو سره روانې ناخوالې پاې ته ورسوو، چې په دې برخه کې ستاسو درنو مشرانو او چارواکو سلا مشورې او همکارۍ اړينې دي.
