د بلوڅو ستونزې واورېدل شوې!
د سرحدونو او قبایلو چارو وزیر ښاغلي محمد شفیق ګل آغا شېرزي نن چهارشنبې د ۱۳۹۸ لمریز کال د لیندۍ میاشتې په ۱۳ مه نېټه په بېلابېلو ولایتونو کې د مېشتو بلوڅو قومي مشرانو سره د خپل کار په دفترکې وکتل.
په دې کتنه کې، چې د وزارت د جرګو او قبایلي چارو د همغږۍ مرستیال ښاغلي محمد یعقوب احمدزی او د دفتر رئيس ښاغلی نور آقا ناصري هم حاضر و، راغلو مشرانو د یو لړ سیمه ییزو ستونزو شریکول ترڅنګ د وزارت له مشرتابه څخه مننه وکړه، چې تل يې د قومي مشرانو او مخورو ستونزو ته پر وخت رسیدنه کړې او ورته یې د حل لارې چارې پیدا کړي.
ورپسې د سرحدونو او قبایلو چارو وزیر ښاغلي محمد شفیق ګل آغا شېرزي په خپلو خبرو کې د یادو قومي مشرانو ستونزې پرځای وبللې وې ویل: دا په ډاګه ده، چې بلوڅ قوم د تاریخ په اوږدو کې د نورو قومونو په څېر د خپل هېواد او خلکو څخه دفاع کړې او تل یې په ملي مسایلو کې برخه اخیستې ده، چې انشاالله ستاسو درنو مشرانو ستونزې به هم د حل په موخه د دولت ترلوړپورو چارواکو پورې ورسوم او په ګډه به ورته د حل لارې چارې پیدا کړو.
