بلخ کې د يوې ۱۲ کلني بدي ترڅنګ تخار کې هم د ځمکې د ملکيت پر سر شخړه حل شوه
دوشنبه ۵ صفر المظفر۱۴۴۸
د بلخ لايت د سرحدونو، قومونو او قبایلو چارو رياست د رئيس په مشري د دې ولايت په نهرشاهي ولسوالي کې د ځينو خپلمنځي اختلافاتو له کبله راپورته شوې دولس کلنه بدي د ياد ولايت د سرحدونو، قومونو او قبايلو چارو رياست د مسؤلينو او قومي مشرانو په هلو ځلو پای ته ورسېده.
د دغه بدي له امله د دواړو لوريو ترمنځ د تېرو دولسو کلنو راهېسي ګنې ستونزې موجودې وې او وخت ناوخت به د دواړو خواوو ترمنځ فزيکې شخړې هم رامنځته کېدې، چې مسؤلينو په خپل منځګړيتوب د پای ټکی ورته کېښود.
په همدې حال کې د تخار ولايت د سرحدونو، قومونو او قبايلو چارو رياست استازو د ځايي قومي مشرانو او ديني عالمانو په هڅو دغه ولايت کې د ځمکې د ملکيت پرسر راپورته شوې شخړه په سوله ييز ډول حل او فصل کړه.
د يادو شخړو د حل په مراسمو کې د سرحدونو، قومونو او قبايلو چارو وزارت محلي ادارو مشرانو له عامو خلکو وغوښتل، چې د هرې لويې او وړې ستونزي پرمهال دې له زغم او صبر کار واخلي او شخړې دې په همدې ډول د خبرو اترو له لارې هوارې کړې.
