د قومي شوراګانو مشرانو او استازو د سولې په اړه خپلې طرحې او نظریات د وزارت له مشرتابه سره شریک کړل!
د سرحدونو او قبایلو چارو وزیر ښاغلي محمد شفیق ګل آغا شېرزي نن سې شنبې د ۱۳۹۸ لمریز کال د مرغومي میاشتې پر ۳ مه نېټه د هېواد د بېلابېلو قومي شوراګانو له مشرانو او استازو سره د وزارت د کنفرانسونو په تالار کې وکتل.
په دې کتنه کې د وزارت مسلکي مرستیال ښاغلي ډاکټر فریدون بارکزی، د جرګو او قبایلي چارو د همغږۍ مرستیال ښاغلي محمد یعقوب احمدزي، د جرګو او قبایلي چارو د همغږۍ رئيس ښاغلي نیاز محمد امیري او یو شمېر سلاکارانو او ریسانو هم ګډون درلود.
په پیل کې د سرحدونو او قبایلو چارو وزیر ښاغلي محمد شفیق ګل آغا شېرزي د سولې د ټينګښت په تړاو خبرې وکړې وې ویل: سوله یو الهي نعمت دی، په دې کې هیڅ شک نشته، چې سوله زموږ اساسي غوښتنه ده، خو دا یو عملي او همغږي کار او هڅو ته اړتیا لري د تلپاتې سولې ټینګښت د یوې ټولنیزې غوښتنې او اړتیا په توګه په موږ ټولو افغانانو پورې تړاو لري موږ اوتاسو هر یو باید په دغه برخه کې خپلې هڅې ونه سپموو لکه دا نن، چې سره راټول شوي یو د سولې په اړه خبرې کوو او په دې اړه طرحې سره شریکوو او نظرونه تبادله کوو، موږ باید تل په دوامداره توګه سره غونډې ولرو، ترڅو په دې برخه کې د ژورو خبرو او بحثونو وروسته نظرونه او غوښتنې راټولې او له ولسمشر سره یې شریکې کړو.
همدا راز ښاغلي محمد شفیق ګل آغا شېرزي زیاته کړه موږ مخکې هم د هېواد له ملي شخصیتونو، مطرحوسیاسیونو، دیني عالمانو، مخورو، مدني فعالانو او له قومي مشرانو سره د سولې د ټینګښت په اړه خبرې کړي او په دې برخه کې مو نه ستړې کیدونکې هلې ځلې ترسره کړي دي.
ورپسې د قومي شوراګانو یو شمېر استازو هم خبرې وکړې او د سولې په اړه یې خپلې طرحې، نظرونه او وړاندیزونه د وزارت له مشرتابه سره شریک کړل او غوښتنې یې دا وې، چې یادې طرې دې په راتلونکي کې له افغان ولسمشر سره شریکې شي.
وروسته د وزارت مسلکي مرستیال ښاغلي ډاکټر فریدون بارکزي او د جرګو او قبایلو چارو د همغږۍ مرستیال ښاغلي محمد یعقوب احمدزي هم په خپلو خبرو کې د سولې د ټینګښت په برخه کې دوزارت تېرو هڅو ته په اشارې سره وویل: د سولې او ملي یووالي په ټینګښت کې د قومي شوراګانو رول له ارزښته ډک دی او له قومي مشرانو څخه یې وغوښتل، چې په ملي مسایلو کې دې د وزارت سره په همغږي توګه ګډ کار هلې ځلې وکړي.
نوموړو همدا راز زیاته کړه، چې ستاسو درنو مشرانو طرحې اغېزمنې دي او د ټولو نظرونو او وړاندیزنو د راټولولو وروسته به یې له افغان ولسمشر سره شریکې کړي.
غونډه په هېواد کې د تلپاتې سولې په دعايې سره پای ته ورسیده
