د خوست ولسونو له اسلامي نظام څخه خپل بشپړ ملاتړ څرګند کړ!
1400/7/15
1443/2/30
په هغې ولسي غونډې کې، چې نن د خوست ولایت د سرحدونو او قبایلو چارو رياست تالار کې جوړه شوه د سرحدونو او قبایلو چارو وزارت سرپرست محترم ملا نورالله نوري، خوست والي محترم ملا محمد نبي عمري، د وزارت د عامه اړيکو او ښوونې او روزنې مسوول ښاغلي شيخ حضرت ولي حقاني د خوست د ټولو قومونو مشرانو، دیني علماوو، ځوانانو، د قومي شوراګانو استازو، ژورنالستانو او د بېلابېلو ادارو منسوبینو پکې ګډون درلود.
غونډه د قرانکریم د څو مبارکو ايتونو په تلاوت پيل شوه ورپسې د خوست سرحدونو او قبایلو چارو رئیس محترم شیخ کليم الله فاني لومړۍ له مرکز څخه راغلي پلاوي او ګډونوالو ته ښه راغلاست ووایه او د غونډې اهداف او اجندا يې بيان کړه. وروسته څو تنو قومي مشرانو او چارواکو د نورو په استازېتوب په خپلو خبرو کې د افغانستان د اسلامي امارت د بریاوو له امله مبارکي وویله او دغه بریايې الهي نصرت وباله. دغه راز یې د ستونزو په حل کې د اسلامي امارت د سرحدونو او قبایلو چارو وزارت څخه د همکارۍ غوښتنه وکړه او له اسلامي امارت څخه يې خپل بشپړ ملاتړ څرګند کړ.
همدا راز د سرحدونو او قبایلو چارو وزارت د اطلاعاتو او ښوونې روزنې مسوول ښاغلي شيخ حضرت ولي حقاني په خپلو خبرو کې د افغانستان اسلامي امارت برياوو ته په اشارې سره وويل: چې د اسلامي امارت مجاهدینو د زرګونو شهیدانو په سرښندنې او الهي نصرت سره د اسلام او خلکو دښمنانو ته ماتې ورکړه نو په کار ده، چې د افغانستان ټول ولسونه سره لاسونو ورکړو او د اسلامي شریعت په رڼا کې د خپل هېواد د آبادۍ او سرلوړي لپاره نه ستړي کېدونکې هلې ځلې وکړو. نوموړي له خلکو سره د ا.ا.ا د مجاهدينو ښه چلند او له دوې سره د ګډ کار په اړه هم هر اړخيزې څرګندونې وکړې
. ورپسې د سرحدونو او قبایلو چارو وزارت سرپرست په خپلو خبرو کې د خوست ولايت خلکو له مېلمه پالنې او وطني احساس څخه د مننې په ترڅ کې وویل: چې دا ستره بریا د ټولو مسلمانانو په ځانګړې توګه د افغان ولس د مشترک جهاد پايله ده. مهمې موخې مو د خپلواکی ترلاسه کول او اسلامي نظام ټينګښت و ،چې په الهي نصرت او د افغانانو په سرښندنو سره خپلو اهدافو ته ورسېدو اوس په کار ده ، چې په ګډه د هېواد اقتصادي حالت ښه او پیاوړی کړو. په الله ج او د هغه په راستول شوي قرآن عظیم الشان مو کامل ایمان دی او په دغه لاره به روان یو. محترم نوري دغه راز د جهاد په دوران کې د قبایلي مشرانو له همکاریو مننه وکړه، وویل: چې قبایل ایمانداره، حریت او اتحاد خوښوونکي او پیاوړي خلک دي، چې په دغو اصولو هرڅه ترسره کیږي.
ښاغلي نوري زیاته کړه، چې پالیسي مو د دین له نظره واضح ده د دې پالیسې تر عنوان لاندې به له هېوادونو سره د خپلو اسلامي اصولو، تاریخ او عنعناتو مطابق اړيکې پالو. اسلامی امارت د هېواد د هرې برخې جوړونې او رغونې ته ژمن دی او دا زموږ لومړیتوب دی، چې د خپلو ټولو ولسونو ستونزې هوارې کړو. وروسته د خوست والي محترم ملا محمد نبي عمري په خپلو خبرو کې د سرحدونو او قبایلو چارو وزارت کړنې وستايلې، افغانان په تېره بيا قومي مشران يې ډ خپل هېواد او نظام ملاتړ او ساتنې ته وهڅول.
