د هېواد زړور ملي امنیتي او دفاعي ځواکونه د مخالفینو پر وړاندې د جګړې توان لري او هغوی ته یې تل خپله مېړانه د جګړې په ډګر کې ثابته کړې ده
یاد اصل ته په کتو د افغانستان اسلامي جمهوریت، ټول ولس، ښځې، نارینه، ځوانان او په ټوله کې د دې هېواد بېلابېل قشرونه باعزته سوله غواړي. زموږ غوښتنه او د افغان ولس غوښتنه داده، چې مخالفین دې پر اوربند تمرکز وکړي. بیا نو موږ باعزته سولې ته رسېدلای شو. او که دا ناوړه جګړه او وینې تویدنه بنده نشي موږ به دایمي سولې ته ونه رسېږو. دغه راز د سولې په برخه کې د افغان ولسمشر عملي هڅې د ستایلو دي. پر همدې بنسټ پنځه زره طالب بندیان افغان ولسمشر محمد اشرف غني له بند خونې څخه خوشې کړل. همدا راز د سولې مذاکراتي پلاوی د سولې خبرې په مخ وړي. دا سولې ته د دولت او ولسمشر پخه اراده او ژمنتیا ښایي. موږ هغه سوله غواړو چې په هغې کې د خلکو عزت، شل کلنې لاسته راوړنې د خویندو او وروڼو حقوق، ملي ارزښتونه او ملي بنسټونه خوندي وي. پر مخالفینو غږ کوم، چې وینه تویدنه بنده کړئ. د ښوونې او روزنې له مخنیوي څخه لاس واخلئ. دا خلک پرېږدئ چې د پرمختګ او انګشاف پر لور حرکت وکړي. د سولې کوم بهیر چې زموږ لخوا روان دی له نړیوالو اصولو سره برابر دی. تر دې مناسب انتخاب نه لرو. د ولسمشر منطق او قدم اخیستل د سولې لپاره مناسب اقدام دی. هر تصمیم چې نیول کېږي د مسوولیت په پام کې نیولو سره نیول کېږي. د سولې لپاره عملي کار روان دی د داسې سولې لپاره چې زموږ ټول ارزښتونه پکې خوندي شي. له ولسونو مې غوښتنه ده چې خپل غږ د سولې، اوربند او د شته نظام د بشپړ ملاتړ په پار اوچت کړي او سره منسجم شي. ځکه چې ستاسو ولسونو غږ، اراده، رول او پرېکړې ډېرې ګټورې دي. محب الله صمیم د سرحدونو او قبایلو چارو وزیر
