جوزجان کې ۱۲ کلنه او بادغيس کې ۳ کلنه شخړه حل شوه
پنجشنبه ۲۸ محرمالحرام ۱۴۴۷ د جوز جان ولايت مرکز شبرغان کې د دوو کورنيو ترمنځ له تېرو ۱۲ کلونو راهيسې د ځمکې پر سر راپورته شوې شخړه، چې دواړو خواوو ته يې لويې ستونزې جوړې کړې وې د ياد ولايت د سرحدونو، قومونو او قبايلو چارو رياست مسؤلينو، قومي مخورو او علماوو په همکاري حل او دواړو خواوو وروسته له ۱۲ کلونو روغه وکړه. همدا راز د بادغيس ولايت په دريبوم ولسوالۍ کې د دوو کورنيو ترمنځ هغه راپورته شوې ۳ کلنه شخړه هواره شوه، چې له دواړو لوريو پکې درې تنه ټپيان شوي وو او ژور اختلافات يې ترمنځ موجود وو. د دغه روغې جوړې په موخه د بادغيس ولايت د سرحدونو، قومونو او قبايلو چارو رياست استازو، قومي مشرانو او ځايي خلکو بيا بيا هڅې وکړې، چې په پايله کې يې دواړوه کورنۍ سره پخلا او د ورورولۍ ژوند ته يې مخه کړه.
