په بامیانو ولایت کې د شخړو د حل کمیسیون د تېر کال په اوږدو کې ۳۸ شخړې حل کړې دي
۲۷/۱/۱۴۴۵
د بامیانو او میدان وردګو ولایت قومي مشرانو او د شخړ و د حل کمیسیون غړو د سرحدونو، قومونو او قبایلو چارو سرپرست وزیر الحاج ملا نورالله نوري او د کوچیانو چارو د سمون لوی رئیس مولوي ګل زرین کوچي سره د یاد وزارت د غونډو په تالار کې وکتل. په دغه کتنه کې راغلیو مشرانو د وزارت له ټولو کارونو څخه خوښي څرګنده کړه او په یاد ولایت کې د کوچي او هزاره قومونو تر منځ د ښې همغږۍ د رامنځته کولو غوښتونکي شول. دوی وویل چې یادو قومي مشرانو او د شخړو د حل کمیسیون په تېر کال کې د خلکو تر منځ ۳۸ لویې او وړې شخړې حل کړې دي او د خلکو تر منځ یې د یووالي او ورورولۍ په را منځته کولو کې چټک کار کړی دی. ورپسې سرپرست وزیر ښاغلي نوري او د کوچیانو لوی رئیس ښاغلي کوچي د راغلیو مشرانو هڅې وستایلې او دوی ته یې د ښه راغلاست تر څنګ وویل: موږ په څو ولایتونو کې د منازعاتو د حل په موخه کمیسیونونه جوړ کړي چې په دې برخه کې یې مؤثر کار کړی او خلک ورڅخه راضي دي. سرپرست وزیر زیاته کړه : زموږ هیواد د ۲۰ کلونو ناخوالو ځپلی ده او په ټولو ولایتونو کې مو د همدې ناخوالو له کبله ډېرې ستونزې را پاتې شوې چې موږ یې د حل په برخه کې پوره پاملرنه کړې ده. هغه وویل: موږ د خلکو تر منځ شخړې حل کړې دي او د هغوی ستونزې مو د حل په موخه له رئیس الوزراء او نورو اړوند ارګانونو سره شریکې کړې دي. ښاغلي نوري وویل: که چیرته موږ او تاسې یوبل برداشت کړو او له زغم څخه کار واخلو هیڅوک به مو یووالي ته زیان ونه رسوي.
