د خلکو ستونزو هوارولو ته به لومړیتوب ورکړو!
دغه خبره د سرحدونو او قبایلو چارو سرپرست او نوماند وزیر ښاغلي محب الله صمیم نن پنجشنبې د ۱۳۹۹ لمریز کال د وږي میاشتې پر ۲۷ مه نېټه د هلمند ولایت د خلکو له استازي ښاغلي میرویس خادم او په اسلامي کنفرانس کې د افغانستان له سفیر ښاغلي ډاکټر محمد شفیق صمیم سره د کتنې په ترڅ کې څرګنده کړه.
په یاده کتنه کې راغلو مشرانو ښاغلي محب الله صمیم ته د سرحدونو او قبایلو چارو وزارت د سرپرست او نوماند وزیر په توګه د ټاکل کېدو له امله د مبارکي وویله.
همداراز دواړو لورو په هېواد کې د سولې د ټینګښت، د قومونو په انسجام، د موجوده نظام په ملاتړ، د قومي مشرانو او دیني عالمانو سره په سلامشور او په یو لړ نورو ملي مسایلو بحث او خبرې وکړې او په دې برخو کې یې په ګډو هلو ځلو ټینګار وکړ.
