د افغانستان او ترکمنستان هېوادونو د لوړ پوړو پلاوو تر منځ د سرحدي ستونزو په اړه غونډه وشوه.
په هغې غونډه کې، چې نن د روان ۱۴۰۰ لمريز کال د لېندۍ مياشتې په ۲مه نېټه د ترکمنستان په سرحدي ښارګوټې کې جوړه شوه، د افغانستان اسلامي امارت د سرحدونو او قبایلو چارو وزارت مرستيال محترم مولوي ګل زرين کوچي د وزارت د مقام ددفتر رييس محترم شیخ حضرت ولي حقاني او ورسره مل پلاوي او د ترکمنستان هېواد د سرحداتو وزارت معين او لوړرتبه چارواکو برخه اخيستې وه.
په دې غونډه کې دواړو لورو د سرحدي ستونزو، د خلکو په تګ راتګ کې د اسانتياوو د رامنځته کولو، د سرحدونو امنيتي چارو د بهبود او د ښه ګاونډيتوب د دوام په اړه په تفصيل سره خبرې وکړې او دواړو پلاوو يو بل ته ډاډ ورکړ، چې ستونزې به هواروي او دوستانه اړیکې به لا پسې پراخوي او په بېلابېلو برخو کې به له يو بل سره بشپړه همکاري کوي.
