په بدخشان کې د علماوو شورا له ریس او غړو سره کتنه!
د سرحدونو او قبایلو چارو وزیر ښاغلي محب صمیم نن بدخشان ولایت ته دخپل رسمي سفر په لومړۍ ورځ ددغه ولایت د علماوو شورا له ریس ښاغلي مولوي حفیظ الله سره وکتل.
په دې کتنه کې دیني عالمانو ښاغلي صمیم ته د ښه راغلاست او هرکلي ویلو په ترڅ کې له طالبانو له خوا اوسنۍ جګړه نامشروع وبلله، چې هیڅ ډول دیني توجیه نه لري او د نړۍ ټولو علماوو دغه ناروا جګړه غندلي.
ورپسې د سرحدونو او قبایلو چارو وزیر د دوې د خبرو په تایید وویل: دیني عالمان د هېواد اغېزمنه پانګه ده، چې د منبر او غوڼدو له لارې کولای شي په هېواد کې د سولې د ټينګښت لپاره کار وکړي.
ښاغلي صمیم زیاته کړه: بدخشان ته زموږ د سفر موخه هم ستاسو په شمول د دې ولایت له ګڼو قومي مشرانو، مخورو، ځوانانو او مدني فعالانو سره کتل دي ترڅو د دوې د ستونزو اورېدو ترڅنګ د دوې نظریات او سلا مشورې واخلو او په ګډه د نظام او ملي ځواکونو ملاتړته ولسونه راوبولو.
