د بلخ ولايت په مرکز مزارشريف ښار کې ولسي غونډه جوړه شوه!
۱۴۰۰/۸/۳دوشنبه
د افغانستان د اسلامي امارت د سرحدونو او قبایلو چارو وزارت سرپرست محترم ملانورالله نوري په داسې حال کې، چې د وزارت مقام د دفتر ریاست سرپرست محترم شیخ حضرت ولي حقاني هم ورسره مل و، نن دوشنبه د روان ۱۴۰۰ هجري لمريز کال د لړم په ۳مه نېټه بلخ ته د خپل رسمي سفر په دويمه ورځ په هغې لويې ولسي غونډه کې ګډون وکړ، چې د اسلامي نظام د ملاتړ په پار ددغه ولايت د مرکز او مختلفو ولسواليو ګڼشمېر قومي مشرانو، ديني عالمانو، ملکي او پوځي چارواکو، ځوانانو او ډ رسنيو د استازو په ګډون د دغه ولايت په مرکز مزارشريف ښار کې جوړه شوې وه.
غونډه د کلام الله مجيد د څو مبارکو ايتونو په تلاوت سره پيل شوه.
په پيل کې د بلخ ولايت سرپرست محترم ملا قدرت الله ابوحمزه ، ښاغلي نوري او مل پلاوي ته ښه راغلاست ووايه، زياته يې کړه، له نن څخه شل کاله مخکې ښاغلی نوري د همدې ولايت د مسوول په توګه خپل هېواد او خلکو ته بې سارې خدمتونه وړاندې کړي و.
ورپسې څو تنو قومي مشرانو، مخورو او چارواکو د نورو په استازيتوب خبرې وکړې او بلخ ته يې د سرحدونو او قبایلو چارو وزير او مل پلاوي د سفر له امله خوښي څرګنده کړه او د ولسونو په انسجام، د نظام ملاتړ ته د خلکو رابللو او ولسي غونډو په جوړولو کې يې وزارت د مشرتابه هلې ځلې وستايلې.
نوموړو له اسلامي نظام څخه د ملاتړ څرګندولو په ترڅ کې خپلې يو یو لړ سيمه ييزې ستونزې د حل په موخه ورسره شریکې کړي.
ورپسې دسرحدونو او قبایلو چارو وزارت سرپرست ښاغلي ملا نورالله نوري په خپلو خبرو کې بلخ ولايت ته د خپل رسمي سفر ډ موخو په اړه چې هغه د اسلامي امارت د اهدافو او پاليسيو بيانول، د ولسونو د ستونزو اورېدل او د اسلامي نظام ملاتړ ته د خلکو رابلل دي، رڼا واچوله او مننه يې وکړه، چې د بلخ شريف خلک د نظام ملاتړاو ساتنه کوي.
ښاغلي نوري دغه راز نوموړو ته ډاډ ورکړ، چې ستونزې به یې د حل په موخه تر اړوندو ادارو پورې ورسوي.
د سرحدونو او قبایلو چارو وزارت سرپرست د خپلو خبرو په دوام وويل: افغانستان اوس د الله ج په مرسته او د مجاهدینو په قربانيو او هلو ځلو له اشغال څخه خلاص شو، ددې وخت رارسيدلې، چې افغانان له اندېښنې پرته د هېواد بيا رغونې او اقتصاد د پياوړتيا لپاره په ګډه کار وکړي.
ښاغلي نوري دغه راز د مجاهدينو مبارزو او سپېڅلو کارنامو ته په اشارې سره وویل: دا د افغانانو د مقدس جهاد پايله ده، چې اوس موږ د اسلامي نظام خاوندان يو او زموږ پت او عزت پکې خوندي دی.
په دې غونډه کې دغه راز ديني عالم شيخ عبدالغفار هم د اسلامي امارت چټکو فتوحاتو او برياوو ته په اشارې سره د اسلامي نظام ښېګنې او ګټې بيان کړې او خلک يې اتحاد او اتفاق ته راوبلل.
وروسته د وزارت د مقام ددفتر رييس محترم شیخ حضرت ولي حقاني خبرې وکړې زياته يې کړه: الله پاک پر موږ لوې احسان او پېرزوينه وکړه ، چې په خپل نصرت سره يې زموږ په هېواد کې اسلامي نظام ټينګ کړ، اوس دا د ټولو افغانانو مسووليت دی، چې د اسلامي او شرعي نظام ساتنه او پالنه وکړو او د الله تعالی ددغه عظيم نعمت ناشکري ونه کړو.
